Bon, dins à peine eun' semaine, in va in minger, in minger... In espérant qu'ein' n'finira pas par avoir sin foie aussi cras qu'chés volalles !

Mi, ej' sus sûr qu' id'na qui pinss'nt qu' ch'est dommache ed' pas faire pindint chés fêtes, eun' bonne viante ed' nou tiot pays. Bon, ché vrai, i faudrot pas oblier qu'ein a quand même ed' quoi faire vecque Licques par eximpe (je m'pourlèque d'jà à l'idée ed' rogner ein oche ed' pintate ou d' coqu'let !).

- "Et si ein mingeot un bon foie cras ed'massou (cha veut dire canard)... ? qu' j'a invie d'vous dire
- Bah, cha n'va pas dins t'chiête, Jacky, té viens d' dire qu'ein devrot mier local ! Faudrot savoir c' que té veux..."
- Et, bein, just'mint, acoutez cha..."

Nous ar' v'là 2000 ans in arrière. Cha s'passe dins nou tiot pays, dins choqu'ein app'lot à l'époque el' "Morinie". Pourquoi cha, el' Morinie ? Et bein, cha vient d'ein gars qui s'app'lot Morin à l'époque, et qui avot donné sin nom à ch'coin-là. Jord'hui, cha s'appelle chés Flandres maritimes... Bon, v'là pou l'situation. Ach't'heure, v'là l'histoire.

Tout l' monte y connot César, j'in sus sûr. Juste après li, y' d'na eu un aute, qui s'app'lot Auguste. Dins nou coin, à ch' t'époque-là ein devot sûr'mint l'appeler "Augusse". Mais ché pas l' sujet. Alors Augusse, ch'tot l'Emp'reur ed' sin pays, el' chef quoi. Et pi, apparemmint, y avot querre chés ojons. Et pis, pas n'importe luquels. Et ouais, si in s' réfère à Pline l'Ancien (un viux naturalisse du timps ed' nou Jésus), chés Romains y z'étott'nt friands ed' foie cras. Et ouais, cha 'xistot d'jà el' gavache, mes gins ! Bref, lu préférence alle allot pour chés ojons et chés massous de l'Morinie. Et pi comme i z'avottent vraimint querre cha, et bein, tout bonn'mint, i les féjott'nt ev'nir direct'mint ed' nou pays à l'Italie ! Et par qu'u moïen ? Et ben, à pattes ! Et ouais, cha f'jot du qu'min, et ch'tot d'jà eun' vraie transhumance.

Oh, j'dis pas qu'i z'arrivott'nt tertoutes, mais i z'arrivott'nt in assez grand nompe pou satisfaire chés Romains. Ainsi, si ein pouvot es' déplacher dins ch'temps-là, ein pourrot vire des troupiaux ed' milliers d'ojons et sûr'mint aussi ed' massous imprunter cheulle fameusse voie romaine, qui, elle, 'xiste toudis 2000 ans après...