Ech' pourcheau (2)

Allez, in s'armets dins chés pattes de ch' pourcheau... Comme j' l'avos d'jà dit, ch' t'à partir du début dez' années 60, qu' cheule coutume alle comminche à s'in aller. Faut dire qu'i a eun' loi qui étot v'nu s' mette in travers ed' tout cha. Du jour au lend'main, ein n'avot pus l' drot d'estoquer (tuer, in gros) sin pourcheau so-même : y paraissot qu' ch'tot pus "sérieux" dins choqu'ein dénommot el' z'abattoirs. Té parles ! Comme si chés z'hommes y z'avott'nt attindu eun' structure pou eusses donner ch' coup d' grâce à lu biêtes...

Dins ch' Nord, y avot certains cinsiers qui estoquott'nt jusqu'à tros pourcheaux par an. Chés moins riches, i s' mettott'nt à plusieurs pou d' n'él'ver un seu. Après tros à chinq mos d' ingraiss'mint, pindint chelquels ein faijot attintion à n' pas perte ch' l'animal, i étot vénu ch' temps pou nou pourcheau ed' donner à chés familes non seul'mint choqu'alles attindot d' li pou mier (minger) de l' viante tout' l'année, mais surtout pou lu donner ech' fameux cérémonial de l' estocate (tuerie) du pourcheau.

In choisissot ch' l'hiver pou s'adonner à ch' t'affaire-là.  D'abord, passque pou chés cinsiers, ch'tot l' "saison morte" pou lu tierre et aussi à cause d' chés timpératures basses duqu'ein n' risquot mi d' rincontrer chés mouques qui z'aurott'nt "gâté" l' viante ein in rien d' temps (dins nou corons, y avot mi d' règles, passqu' i avot jamais d' pausse : au fond, ch' tot toudis l' même saison...) Ech' z'anciens, comme min pépère i m'espliquot, i z'avott'nt toudis querre oeuvré vecque el' leune (lune dins nou patois), qu' cha soit pou lu gardin mais aussi vecque el' tuerie du dale (synonyme ed' nou pourcheau). Ainsi, ch'tot ein leune vieile qu'ein comminchot tout cha, et, toudis d'après min pépère, passqu'i paraîchot qu' cheule viante a n' rincissot pas trop vite.

Nou v'là arrivés ein pleine action ! In est au matin, ed' bonne heure (et ouais, mes gins, in hiver, chés journées alle sont vraimint courtes). Dins chés caudrons, in prinds soin ed' faire caufer de l'iau dins cheulquelle chés morchiaux d' nou pourchiau i finiront éboulintés. Comme ch'tot impossipe ed' s'ein sortir tout seu, ch'est tout naturell'mint qu' ch'est dév'nu eun' affaire ed' famile, qui mellot souvint même ech' voisinache. Asteure que ch' rinfort i étot arrivé, i fallot pinte nou animal et faire in sorte qui n' bouge pus, et là, pou mi l'avoir vécu personnell'mint, ej' vous jure qu' ch'tot loin d'ête gagné ! In y loïot ses pattes, et j' vous promets qu' cha cahulot (hurler), ch'tot insupportape ! Après i fallot l' couquer su sin flanc (cha cahule toudis, et même ed' pus in pus fort !). Es' patte arrière étint loïée, cheule biête lévée, ech' saigneux i rintrot in piste...

Nou saigneux i avot à s' ceinture, choqu'ein app'lot dins ch' Nord es' "boutique". Eun' drôle ed' boutique vous m' direz ! Y avot qu' des coutchiaux et ch' fameux fusil pou l' z'aiguiser. Vecque ech' pus pointu, cha d'vot aller vite, direct'mint dins s' carotide. Jaillissot alors eun' fontane ed' sang. El' cinsière (ou ch' bonnet blanc dins nou corons), alle rintrot alors in scène. Vecque eusse bachène (bassine), alle d'vot récupérer ech' précieux liquite. Au fond, y avot un tchiot peu d' vinaique et i fallot mélinger tout cha énergiqu'mint, vecque eun' cachoire ou eun' écourite (fouet). Pourquo ? Passque chés chinq lites (inviron), i fallot sûr'mint pas qu' cha coagule, sinon à Dé chés boudins ! In écrivant, ej' pourros l'oublier, mais faut surtout pas, rapp'ler qu' nou pourcheau, y' est core vivint. Et j' te prie d' croire qu' cha continue sérieus'mint à cahuler... J'intinds core certains gosses braire !

Bon, asteure, ché silence. Cheule biête, alle a passé d' vie à trépas. Ein l' déloïe, ein l' posse sur eun' tape ou core su eun' équelle (mi, dins ch' Sud-Ouest, ché toudis l'équelle). Et l'iau de t'à-l'heure, alle va servir à "netchier" l' biête. Ein dégraffe (gratter) comme in peut el' soèe (soie : sin pelache, in somme), et vecque ed' l' étrain (paille) qu'ein va alleumer, ein va terminer "l'épilation". Cheule soèe, alle étot, dins ch' Nord, parfos récupérée pou ête vindue à chés fouffetiers (chiffonniers, dins nou patois : j'arviendrais un jour su eusses...).
J' vous passe chés détales su l' décopache (découpe) : ch'est technique et ein n' pouvot mi improviser. Mais, à l'époque, mi b'soin d'ête mazeau (boucher, in viux patois), ein apprenot cha ed' père in fils bein souvint... Ein n' jech'tot rein du tout. Mi, je m' souveins d'avoir été nétchier chés tripes ed' nou pourcheau dins l'iau de l' rivière, et in hiver !

Bon, pou tous cheux qui arrott'nt connu cha, ej' pourros vous parler de ch' jour d'atau (eun' fête, in somme, et toudis dins nou patois) qui suivot ch' traval-là. Mais cha f' ra sûr'mint l'objet d'ein aute artique. In tout cas, si i fallot arténir juste eun' cosse de m' bafoule, mi, ej' vous promets qu' rein n'a cangé ed'puis qu'euche sacrifice de ch' pourcheau i exisse. Pourquo ? Passque j'ein sors, ch'a fait à peine un mos... Et, comme avant, tout est toudis bon dins ch' pourcheau...

Min artique, je l' dédie à min copain Aldo, ch' ti qui m'a initié à tout cha.

Comments

[Jacky Wallart]

Et ouais, Marie-Claire, t'as raison. Ch'est vrai qu' cha a duré bein après chés z'années 60 (el' loi alle est ed' 1967 ou 68 ej' cros) cheule tuerie. Jord'hui core, dins chés villaches, in peut l' vire cha et là. Mais, i faut quand même arconnaîte qu' cha va s' terminer un d' ces quate. In revanche, cha m'étonnerot fort qu' dins chés corons, id' na qui élèf't'nt core ech' pourcheau comme avant. Enfin faut vire, in n' sait jamais...
A Dé.

[Marie-Claire]

Ben mi aussi cha m'rapelle des souvenirs d'avoir vu tuer ech'pourcheau , pas à m'mason, mais j'habitos à la campagne et chétot à l'cinse voisine
Cha m'avot marquée el cri du pourcheau qu'in égorge ... par conte i zont fait cha plus tard que les années 60 dans les cinses ed min coin, cha s'féjot core dins les années 70, y avot un homme du villache qui féjot cha dins toutes les cinses du villach
Adé