Tros cants d' Noë...

Décidémint, Noë, cha m'inspire. Et pasque ché bétôt el' vingt chinq décempe, ej' viens d'avoir eun' idée. Premièr'mint, ed' mette tros cants ed' Noë qu'vous connaichez sûremint tertous et tertoutes, mais surtout, ej' vas tinter (pas chés cloques hein, nan, cha ché pus tard !) ed' les traduire dins nou langache.

Avint cha, un peu d'esplications : y faut savoir qu'pus in armonte dins ch'temps, et moins in treufe (sytématiqu'mint du moins) des traces écrites de choqu'y s'cantot à l'époq'. Ainsi, et ché surtout l'cas pou un des tros cants ("Y'est né ch'divin infant") : cheule mélodie alle a pas subi ed' trinsformations, ed'puis s' n'origine, ch't'à dire el dix septième sièque : ch'tot un air ed' chasse. Donc pas d'paroles. Chelles qu'in intind asteure et pis qu'ein va lire just'in d'ssous, alle sont du dix-neuvième sièque.
Eun' aute cosse qu'y faut savoir, ché qu'à l'époque (ché vrai pou ch'dix-septième, mais core pus vrai pou ch' seizième, quinzième sièque, etc...), in écrivot pas tout comme asteure, et ché canchons cha faijot surtout partie de l'tradition orale. In écoutot, in arténot, et cha s'passot ed' père in fils et d'mère in file. Et comme tout c'qui s' trinsmet oral'mint, et bein, des fos, cha s'trinsforme un peu, cha évolue, cha oublie des détals, ou cha in rajoute quéqu'fos...
Enfin, ech' deuxième cant, y'a pus deux sièques d'existence, et y'est originaire d'Autriche : "Douce nuit". Là, à part el' traduction ed' l'Autrichien in Frinçais, rien à dire. Et l' dernière, ché l'pus récinte et tout l'monte y connot au moins ch'début : "Petit Papa Noël" ("Eh, Tiot Papa Noë). Chelle-là, alle date ed' 1946. El' musique, ein dot cha à Henri (in prononce Hinri) Martinet et chés paroles à Raymond Vinci. Et pis, pou ch' canteux, je l'précisse, mais normal'mint ché inutile : Tino Rossi. Allez, eun' bon' lecture et surtout, n' vous gênez pas, dins tros jours, intonnez l'air et canter me cha dins nou lanque.

Y'est né ch' divin' infant

(refrain)
Y'est né ch' divin' infant
Juez hautbos, résonnez musettes
Y'est né ch' divin' infant
Cantons tous es' n'avèn'mint

Ed'puis pus d' quate mille ans
Nous l'promettott'nt chés prophètes
Ed'puis pus d'quate mille ans
In attindot ech' t'heureux temps

(refrain)

Ah, qu'y est biau, qu'y est carmant
Ah, qu' ces grâces as'sont parfaites
Ah, qu'y est biau, qu'y est carmant
Qu'y est doux, ech' divin' infant

(refrain)

Eun' étape est sin logemint
Un peu d'étrain est s'couquette
Eun' étape est sin logemint
Pou un dieu, cht'un rute abaiss'mint

(refrain)

In allez-vous, grands rois d'Orient
Vénez vous unir à nou guinsses
In allez-vous, grands rois d'Orient
Vénez quérir nou infant

(refrain)

I veut nou coeurs, i les attind
Y'est là pou faire lu conquête
I veut nou coeurs, i les attind
Donnons-z'y donc prompt'mint

(refrain)

Oh Jésus, Ô roi tout-puissant
Tout tiot infant qu' vous êtes
Oh Jésus, Ô roi tout-puissant
Régnez sur nous intièr'mint

(refrain)

Douce nuit

Douce nuit, saint' nuit
Dins chés cieux, ch'l'astre luit
Ch' mystère annoncé s'accomplit
Ch' t' infant su l'étrain, indormi
Ch'est l'amour infini (X 2)

Saint Infant, doux bédot
Qu'y est grand, qu'y est biau
Intindez résonner chés pipeaux
Bergeolins inménant lu troupiaux
Vers es' n'humble berceau (X 2)

Ché vers nous qu'y accoeurt
In un don sans artour
Dins ch' mond' ignorint ed' l'amour
Du qui comminche asteure sin séjour
Qu'y soit roi pou toujours (X 2)

Queu accueil pou un roi
Pas d' z'abri, point ed' toit
Et dins s' crèche, li y's'gargott' ed' frod
Ô pecqueux, sins attinte cheule crox
Jésus souffre pour ti (X 2)

Paix à tertous, gloire à ch' ciel
Gloire à ch' tette maternel
Qui pou nous, in c' jour ed' Noë
Infanta ech' Sauveux éternel
Qu'attindot Israël (X 2)

Eh, Tiot Papa Noë

Ch'est l' belle nuit ed' Noë
El' neiche étind sin mantiau blanc
Et chés ziux el'vés vers ch'ciel
A génoux, chés tiots infants
Avint ed' feurmer chés paupières
Y faut eun' dernière prière

Eh, Tiot Papa Noë
Quand té déchindras de ch'ciel
Aveucq tes juets par milliers
N'eublie pas min tiot sorler
Mais avint d'arpartir
I faudra bien et' couvrir
Déhors, té dos avoir si frod
Ch' t'un peu à cause ed' mi

I' m'tarde tant que ch'jour i s'lève
Pou vire tout choque té m'as apporté
Tous chés biaux joujoux qué j'vos in rêfe
Et que j' t'as commindés

Eh, Tio Papa Noë
Quand té déchindras de ch'ciel
Aveucq tes juets par milliers
N'eublie pas min tiot sorler

Ch' marchand d'sape y est passé
Chés infants y vont faire lu dodo
Et té vas pouvoir commincher
Aveucq ta hotte su tin dos
A ch'son d' chés cloques d'chés églisses
Et' distribution ed' surprisses

Eh, Tiot Papa Noë
Quand té déchindras de ch'ciel
Aveucq tes juets par milliers
N'eublie pas min tiot sorler
Si té dos t'arrêter
Sus chés toits de ch' monde intier
Tout cha avint d'main matin
Mets-te vite, vite en qu'min

Et quand té s'ras su tin biau nuache
Viens d'abord su note mason
J' n'a pas été toudis bien sache
Mais j'in deminde pardon

Et Tiot Papa Noë
Quand té déchindras de ch'ciel
Aveucq tes juets par milliers
N'eublie pas min tiot sorler

Comments

[Jacky Wallart]

A deux jours ed' Noë, ché vraimint eun' bonne surprisse!
J'in d'mindos pas tant té sais.
Ein m'avot d'jà parlé y'a longtimps, qu'eulle femme de ch'Père Noë, alle s'app'lot Marie-Claire, cha m'étonnot un tiot peu, mais asteure, ej' viens d'comprinte, ch'tot bein vrai ch't'histoire-là !

[Marie-Claire]

Mi j'a ker c'que té fais , ché toudis intéressant et très bien écrit , in va t'mette dins les liens d' Histoires de Ch'tis

[Jacky Wallart]

Bon, ché vrai, cha d'minde un peu d'traval, surtout pou chés rimes et l'longueur ed' chés pieds, mais ein n'y arrife quand même. Je m'sus amusé à canter chés versions-là su l'musique d'origine, et figure-te qu'cha marche...
Ein tout cas, merci pou t'visite, cha m'incourage à continuer. Juste derrière cha, ej' t'invos eun' Histoire de Ch'ti.
A bétôt Marie-Claire et core merci...

[Marie-Claire]

Bravo pour tes traductions !