Chés vakinches ed' Noë
Autrefos, chés vakinches y correspondotent toudis à chés fêtes religieusses. Et i' s'troufe, qu' ch'tot Noë qui étot el' pus importante, car alle étot suivie ed' dousse jours fériés, et pindant tout ch'timps-là, in n'travaillot pas bein sûr...
A ch' t'époque-là, quasimint tous chés gins y vivott'nt à l'campane et lu traval (dins chés camps el' plupart du timps), el' fête ed' Noë alle tombot à point nommé. In hiver, el' tierre alle s'arpose et chés zhommes aveucq. Et d' façon, i n'avot guère ed' traval dins chés camps !
Alors, in prennot sin temps pou festoyer et pou eublier el' longueur de ch'l'hiver. In dansot, in cantot et in faijot de' l' musique...
Pus tard, comme chés gins y vivott'nt gramint plus à l'ville et qui travaillott'nt donc dins chés usines, à l'fosse (et ouais, j'vas quind même pas eublier min pays !), in a raccourchit el' durée d' chés vakinches. Ed' dousse jours, in est passé à deux. In n' pouvot mi laisser chés usines feurmées, et l' fosse cha d'vot tourner, mais surtout, ché qu' cha coûtot querre à l'économie...
Enfin, ché pas grafe, pasque chés gins, jord'hui, y s'arring'nt quand même pou printe quéques jours intre Noë et Nouvio An.
Et j'vas finir par in viux dicton ed' circonstince. Et là, ej dos armercier min photographe préféré Christian Vallez ed' Liévin qui régulièr'mint invot des photos : chés dernières alle sont planes ed' neiche. Voilà donc ech' dicton : "Blanc Noë, vertés Pâques".