Chés mineurs à quate pat'

Chaque fos qu'ein parle d' chés mineurs, ein fait référince à chés z'hommes qui ont usé lu vie "au fond". Et ein a bein raison. Ein a beau écrire, raconter, moutrer l' traval d' chés héros du carbon, ein s' s'imagin'ra, in tout cas jamais complèt'mint, el' dureté d' lu mission. Mieux incore, mi j' troufe qu'ein devrot créer eun' espèce ed' conservatoire oral duqu' chés mineurs incore in vie i  pourrott'nt ête filmés et inregistrés pou nous raconter à tertous l'histoire d' eul' Mine (près d' deux sièques et d'mi) ed' nou Nord-Pas-de-Calais. A ch' propos, je n' peux qu' vous conseiller d'acater un rute traval ed' témoignaches oraux réalisé par Radio-France en 2003 (in partenarait vecque ch' Centre Historique Minier ed' Lewarde) : "Paroles de Gueules Noires" qu' cha s'appelle (aux Editions Frémeaux & Associés) : tros cd, presque chinq heures à acouter chés mineurs parler. Mi j'a tout acouté en eun' seule fos et même réacouter plusieurs fos. Et bein sûr, n'hésitez pas à cacher su ch' l'arnitoile : y'a du traval extraordinaire : Histoires de Ch'tis (et ses liens), ch' site d'André Paillart (des magnifèques photos d'archifes) et tout plein d'autes joyaux. J' vas tinter, dins chés prochains jours, ed' faire eun' liste el' pus exhaustife possipe mais à m' n'avis, cha va t'nir su au moins chinq paches !

Ed' nous imballons pas ! Arvénons donc à nou sujet : chés mineurs à quate pat'.
Ein a tout-d'suite à l'idée ech' bidet qui déchindot pou armonter qu'à s' mort ou quand i étot trop viux. Mais ein pourrot presque parler ichi d'eun' tiote ménag'rie ! Et ouais, y avot pas qu' chés bidets, ein veyot des fos des mulets, des baudets qui savott'nt parfos moutrer lu fichu caractère. I s' mettott'nt des fos in travers d'eun' gal'rie et cha coinchot l'avincée du traval. Comme chés z'hommes, i z'avott'nt leu humeur ! Heureus'mint y avot des subterfuches : cheule peume (pomme) qu'euch' l'animal y avot tell'mint querre et core pus drôle, des fos, du toubac et nou bidet y ardémarrot fièr'mint s' mission in chiquant ! Malheureus'mint pou nou équidé, es' fin alle étot rar'mint drôle. Pas d'artraite... Cha finissot à l' mazeau (viux mot patois pou parler de l'boucherie) dins l' pire des cas. Mais des fos, chés mineurs y s' cotisott'nt pou racater ch' bidet à l' Compagnie et i l'installott'nt dins un camp duqu'i finirot s'vie à l' leumière (même si i veyot quasimint pus rien).

Et pis i avot aussi des pus tiotes bêtes. Ech' quien, et notammint chés races arconnues pou lu instinct à éliminer chés rats qui s' cachott'nt un peu tout partout et surtout autour de ch' l'avoine qu'ein donnot à chés qu'vaux. Comme i avot chés quiens, i avot chés cats pou réguler chés soris. Mais i fallot quand même in laicher un tiot peu. Et ouais, ch' rat, tout comme el' soris, comme i z'avott'nt un odorat et des orelles pus fines que ch' l'homme, in pouvot compter sur eusses pou signaler quetcosse ed' pas normal. Ainsi, quand un coin d'eun' gal'rie alle étot vite ed' chés bestioles-là, ch' mineur i s'méfiot, ch'tot un mauvais présache. Pou l' z'armercier, ch' mineur i hésitot pas à l'heure de ch' briquet, d' lu donner quéques berluques (miettes) ed' broute (pain). Et souvint, ch' mineur qui faijot pas attintion à sin briquet, qui l' suspindot pas assez bein, chés soris alle faijott'nt self-service ! Ed' perte un morciau d' sin briquet, ch'tot d'abord argrettape pou ch' mineur qui comptot vraimint su ch' momint-là pour arprinte des forches mais cha pouvot s'avérer un problème hygiénique. In effet, combien ed' mineurs i z'avott'nt lu boyaux qui groulott'nt après ch' passache d'chés tiots rongeurs.

Et pou terminer su un tiot "mineur à deux pat'", i avot ch' fameux canarien, ch' l'osiau tant affectionné par chés mineurs. Chés compagnies alle les imployott'nt (gratuit'mint bein sûr !) passque sinsibles à  ch' gaz carbonique, i z'indiquott'nt rapid'mint par lu comport'mint el' présince ed' l'anthracite, gaz haut'mint dingereux.

In conclusion, in pourra arténir qu' dins l'histoire, el' Mine alle n'aura aussi usé des mineurs à quate pat' et à deux pat'. Mais cha s'ra toudis moins qu' chés mammifères les pus évolués qu'ein a jamais connus : chés z'hommes...

Comments

[minloute]

toudis bin écrit, on diro des "nouvelles" , ché à la fois concis et dense ché del bonne cuisine cha