Ech' pourcheau (1)

V'là ein mot qu' tout l'monte y a au moins intindu eun' fos. "Que pourcheau !", ou "Ein n' donne mi des pots d' chuques à chés pourcheaux !" ou core "Ch'ti-là, in l'arconnaîtrot au mitan d'un chint d' pourcheaux !" (j'avos un mononcque qui dijot souvint cha...). Bon, vous l'avez bein compris, ech' pourcheau, ché toudis associé à quetcosse ed' négatif, invoyé à l' tiête ed' chés crapés, dès qu'ein parle de ch' blatier (dins nou patois, ein dit cha de ch' l'homme qui s' négliche) ou d'eun' founiousse (cha veut dire parelle mais là, ché quand ein parle d'eun' femme qu'ein app'lot core Blanc bonnet dins min pays minier).
Bref, ech' pourcheau, ein in parle jamais in bien !  Alors, just'mint, j'a décidé d'y rinte hommache à nou goret.

Ein va commincher par es' mette dins l' bain, à l' manière d' ech' pourcheau d'ailleurs qui a querre s'artourner dins l'iau croupie pou s débarrasser d' chés puches. Ein ne l' sait pas toudis, mais l' troule (cheule truie) alle arsanne gramint à nou espèce (ch'est égal'mint un mammifère, comme nous). In effet, lorsqu' alle a mis au monte es' portée d' jon'nes (après inviron 115 jours), alle va devoir allaiter, parfos jusqu'à dousse pétiots, qui mettront tros à chinq heures à moutrer tertous lu guifes ! Cha n' paraît pas comme cha, mais eun' troule, cha donne ed' six à huit lites ed' lait par jour (des fos dousses lites !). Avec cha, ech' tiot pourcheau y' a d' quoi "profiter". In effet, i va deubler sin poids in huit jours, el' mu'tiplier par quate in tros s'maines et par quinsse à vingt (i faut toudis prononcer le "teuh" à l' fin d' vingt : in France, in est les seus à faire cha, ch'est un sine distinctif) in huit s'maines. Vous rindez compte ?

Dins ch' Nord et ch' Pas-d' Calais, comme un peu tout partout in France, in a él'vé des pourcheaux. Id 'na p'tête qui ont connu cha, j'ein sus sûr... Mi, min grind-père et m' grind-mère, dins lu coron, i d' n'avott'nt ingraissé eun' paire, comme chés vosins d'ailleurs. Ch' tot précieux cheule biête-là. Mes aiëux, i m' racontot'nt qu 'ch' étot intéressant comme animal, passqu'i s' mingeot tout intier, d' sin grognon à s' queue ! Dins bien des contrées, i donnot el' seule viante qui étot à l' portée d' chés travailleux de l' campane. In n' laichot rein du tout. In mingeot sin groin donc, ses pieds et mânme ses entralles qu'ein préparot ed' diverses manières : ech' boudin, chés zandoules. Ein conservot s' chair  dins l' saumure (l'ancête ed' nou congélateur, mes gins !). In gardot aussi es' graisse, qu'ein faijot fonte et qu'ein mettot dins des vasses : ech' fameux saindoux, qu' chés mineurs i avott'nt querre artroufer dins lu briquet).
Ech' pourcheau, ché vraimint facile et rapite à él'ver. I minge ed' tout, comme nous incore eun' fos.  Enfin, ch'est quand mânme moins difficile eq' nous, encore  qu' j'ein connos... A l'époque, id' na qui leur donnott'nt l'iau d' lu arlaverie (vaisselle) : ch'tot bien cras et apparemmint i raffolott'nt. I arrivot qu'alle bonne saison, in les mettot dins chés prairies, dins chés camps, eun' fos l' récolte ramassée, ou core dins chés bos duqu'ein trouvot chés glands, châtaines, faînes et toutes chés baies queutes d' chés apes. Et si i avot core faim, vecque sin groin, i cachot dins el' moussée (mousse) chés tiots insèques, chés racheines...
Dins l'étape, in li donnot à mier (minger) du fourrache, ed' zépluchures, et si in désirot l'ingraisser pus vite, ch'tot ch'régime à base ed' peum'tierres cuites mélingées à cheule fareine ed' son. A l' fin, pou qu' cheule viante alle soit meilleure, in y donnot égal'mint du maïs.

Dins l' mason du dale (aute nom in patois pou causer d' nou mammifère), qu'ein app'llot i a longtimps ech' pourchil ou ring (prononcez rein) d' pourcheaux, i fallot faire attintion qu' cha soit bien aéré, ech' daine (sol), i devot ête dallé ou gramint pavé, sinon gare à sin musiau ! : ech' pourcheau déchind du chingler (sanglier dins nou patois), faudrot pas l'eublier...
A s' disposition, de l'iau, chelle qui va esclaper (boire, in patois), pis chelle qui va trinsformer in berdoule, dins cheulquelle, i va s' bourler (rouler) : ch'est s' pommate à li pou s' débarrasser d' chés nombreux parasites.

Bon, vous aurez tertous compris, qu' ch' pourcheau, dins chés sièques d'avant, jusqu'à s' z'années1960 inviron, ch'tot important. In dijot core qu' ch'tot el' tir'lire du paufe. Les pus organisés, i z'él'vott'nt un dale pou l' minger et un aute pou l' vinte. Et i arrivot ch' temps où ch' pourcheau i allot rinte l'âme...

(à suife...)

Comments

[andredemarles]

Salut Jacky,

Excellent blog avec des histoires saisissantes d' réalité.
Merci d' nous les faire partager.
Amitiés ch' tis
André

[lechtimi-ne62]

Un bieau texte que té nous offre la Jacky, mi ch'm' fait piner à l'tirlire comme t'in parle d'ins t'n'histoire,un n'in vot cor pas mal.
Et pi d'in l'cohon tout est bon, a part c'qu'in aime pas.
Allé sur ce , j'té dis bonne journée et à l'arvoyure mes gins.
Amitiés Liévinoises à tertous.

[Marie-Claire]

Bonjour Jacky , comme d'habitute y a rien à ardire ché parfait
Mes grands parints aussi is avottent élévé des pourcheaux dins l'coron et même eune maguette, sans compter ches lapins et ches glaines
Adé
Marie-Claire