El' glaine (2)

El' dernier cop qu' j' sus armonté dins ch' Nord, comme à chaque fos, j'a fait min pél'rinache dins min coron préféré, el' fameusse Cité 40 ed' Grenay. Ej' cachos pus précisémint, si, dins chés gins qui restott'nt là, id' n'avot core qui élevott'nt lu volalle. Et bein, j' n'a quind même treuvé eun' paire et j' tos contint d' vire qu' ch'a continuot ein peu... Et non contint d' vire chés glaines, j'a même réussi à vire quasimint tous chés animaux ed' basse-cour, mais jamais tous insan.ne quand même...

Ainsi, j' sus tombé su ch' fameux dindon, ech' pus grand ed' nou gallinacé. Ch'ti qu' j'a vu, ch'tot ein jôn.ne, mais faut savoir qu' ch'a peut monter jusqu'à 1m30 chés bestioles-là, et même peser jusqu'à onsse kilos ! Ech' dindon, li, i nos est arrivé tard dins nou pays. I a trinsité via ch' Portugal et l'Espagne, au début de ch' 16ème sièque. In l' vot pou l' permière fos à ch' menu du mariache ed' Charles IX (vers 1570). Pus bas qu' nou Nord-Pas-d'Calais, vers Bourches (Bourges), i avot des rutes él'vaches et ch'est même ed' là qui nou arrife ech' surnom de ch' dindon, à savoir "Jésuite" : tout cha passque i avot eun' arssimblance intre ch' crâne d' chés jésuites et l' tiête tondue d' chés volatiles...
Si id' n'a qui veull'nt essayer d'ein él'ver et surtout chés fémelles (dintes), i faut qui sach'nt qu'eun' dinte ch'a comminche à ponte qu' vers un an. Ses uefs, ch'est un vrai régal, et i sont pus gros qu' cheux d' chés glaines. Cha comminche à ponte à ch' printemps (donc bétôt, mes gins !), d'abord tous chés deux jours pindant eun' sémaine, puis tous les jours insuite, et tout cha jusqu'à cheule bête alle a pondu vingt chinq à trinte uefs. Mais, i faut faire attintion passque dès qu' cheule dinte alle pond, alle a querre mucher ses uefs. Et quand alle coufe, parelle, faut el' léver pis des fos i donner à minger, passque in bonne coufeusse, alle s'rot capape ed' s' laicher mourir ed' faim...

Pis, j'a eu l' canche ed' disqueuter vec' ech' propriétaire, ein jon.ne gaillard d'à peine trinte ans. I m'a espliqué qui faijot ch'a in hommache à sin père dont ch'tot l' métier : vindeux d' volalle dins cheule campane d'Arras. Comme i a vu qu' j' m'intéressos à l' cosse, i m'a arfilé eun' adresse (deux rues au-d'ssus)duqu'ein artraité i él'vot un peu d' tout...
Effectiv'mint, min tour i allot pouvoir s'arrêter chi, passque sin gardin, bien muché à cause d' chés aggrippeux (voleux), i rassimblot d'autes gallinacés dins eun' grinte volière. D'abord des pintards (pintades), viux volatile nous vénant d'Afrique du Nord, mais grâce à chés Romains (toudis eusses !). Ech' pintard, li, i a rééll'mint été él'vé que d'puis l' miyeu du 19ème sièque. Et core, id' n'a eun' flopée qui n'avott'nt querre el' z'él'ver à cause ed' ses cris désagréapes. Ech' t'homme i m'espliquot qu' ch'tot eun' rute viante, très fine. Comme j'avos l'air intéressé, i m'a quand même mis in garte, passqu'apparemmint, vec' chés glaines, ch'est pas toudis commote. In effet, qu'i m' dijot, ech' pintard, i a mauvais caractère, et i a querre es' batte, et parfos jusqu'à l' mort d' sin adversaire ! Pou choqu'i est du pondache, ch'est eun' bonne affaire, mais in liberté, faut juer à cache-cache vec' chés uefs. Cheux-ci sont pus pétits qu' cheux d' chés glaines mais rud'mint bons à minger à l' coque. El' ponte, alle comminche avec ch' printemps et s' termine à l'automne. Souvint, qui m' dijot em' n'artraité, chés uefs, i faut les printe et les faire couver à chés glaines, ch'est pus prudent, car ech' pintard i n' sait pas d' trop rester in plache... Et vingt chinq à trinte jours pus tard, naîtra ech' pintardeau (pintadeau).
Vec' chés pintards, i avot un joli coupe ed' faisans, et là i m' dijot qu' ch'tot jusse pou l' beauté d' lu ramache : choque j' peux ichi confirmer. Et dins ein tiot coin, i avot, sin "pouiller miniature" dins chulquel i él'vot des carcailloux (cailles). Mais mi d' canards, ni d'ojons, jusse passqu'i minquot d' plache.
J'a quitté min passionné vec' des uefs d' carcailloux et eun' pleume ed' faisan...

J'a chi terminé vec chés glaines et l' basse-cour. Mais si cha vous disot, ej' pourros tot-à-fait continuer, suffit dé m' l' dire vec' chés commintaires. Et d' cha d'ailleurs ou d'aute cosse...

Comments

[minloute]

t' as raison Jacky pour ché pintates, cha fait un boucan ............... mi qui su dinch' sud ouest asteure et que j a querre m' prom'ner , j' me faijo l' reflexion que commint qui faijotent ché gins qui habitotent à coté d un el' vache ed' pintates in liberté ......pire que si té rintro dans eune classe d' école primaire, section garnoules ............. ché assourdissant, répétitif, et meme à la fin qu in iro bin leur torde l' cou, mais vu l' bruit qui faijotent rin que qu in passo au larche, j ' veux meme pont imaginer l' boucan qu' cha do faire quand que vraimint té lé zeffraie