Ech' blanc-bonnet

Vos rapp'lez sûr'mint, l'aute cop, ch'tot el' journée d' chés fin.mes. Eun' fos par an, qu'ein fête cha... Mi, j'a treuvé qu' ch'tot pas assez. Alors, j'a décidé d'armette ichi eun' couche. Car, asteure, vos savez tout-d'suite choque ch'est qu'ein blanc-bonnet. Et ouais : eun' fin.me, p'tête el' vôte, vou mère, vou suèr, vou grind-mère... Enfin, pou ête pus précis, j' vas surtout vous parler d' chés blancs-bonnets ed' nou Nord-Pas-d'Calais, et pus précisémint, d' chelles ed' nou corons...

J' vas commincher chi par choqu'i n'ein pinssot nou Jules Mousseron (1868-1943), ech' fameux poète ed' Denain. Li, i dijot : "Dins sin ménache, ch'est l' blanc-bonnet qu'est l' maîte". Et bein, tout est dit là-d'dins mes gins. Ein ménache sans blanc-bonnet et cha n' tournot mi rond. Eun' tiote parinthèsse pou espliquer duqu' cha nou vient ech' mot-là. Pas pus loin qu' ech' capiau blanc qu' nou aïeulles alle portott'nt su lu tiête ! El' parinthèsse alle est freumée.
Pindint que s' n'homme i étot parti au fond, à l'abattache, ou occupé à ch' jour, ech' blanc-bonnet alle n'avot mi eun' minute à elle ! Passqu'i faut chi savoir, qu' souvint, pou mi dire toudis, i n'avot mi que s' n'homme qui étot parti cacher d' l'argint pou faire vife ech' foyer, y' avot chés gosses aussi. Asteure ein dirot qu' cha mettot du burre dins ch' z'épinaches, mais attintion, ch'tot sûr'mint pas du luxe pou eun' famile qu'invoïer chés gosses au fond, nan, ch'tot malheureus'mint eun' nécessité, pou rester digne. Mais ch' n'est mi l' sujet...

D'abord, tout bêt'mint, i faudrot mi eublier, qu' dès que s' n'homme, ses gosses i s'in allott'nt, ech' blanc-bonnet n'étot pas trinquile : i avot ch' grisou, mais pus souvint chés accidints du fond... Mi j' n'ai qu'ein souv'nir ed' cha. Ch'tot eun' vosine d'amon Cité 40, qui connaichot toudis l'heure à l'quelle sin mari i rintrot. Et comme i prénot à chaque fos ech' même quémin, alle el' guettot par es' ferniète, sin coeur battant, j'imagine bein. Et dès qu'alle el' veyot, hop, alle s' postot à l' huche (porte), fin continte d'arvire sin bonhomme... Es' n'ingoisse alle étot disparue. Mais, imaginons qu'i n'arot pas été-là à l' bonne heure, et là, ch'tot direct'mint eun' suée. Avant qu' chés grèfes ed' mineurs alle débouch'tt'nt su eun' sécurité sociale fiape, chés compagnies, alle n' sinmerdott'nt mi vec' chés veufes : à l' cour chés blancs-bonnets ! Pus d' sous, pus d' mason, pus rein...

El' journée de ch' blanc-bonnet, alle étot toudis bein remplie. Alle dévot sans arrêt faire preufe d'imagination pou sin démerder quand cha n'allot pas. I étot mi question in effet ed' téléphoner à sin mari, comme ein peut l' vire asteure pou d'minder par exempe "Allo, duqu' ch'est qu' t'as mis chés clefs...". Nan, i fallot bein du courache pou s'in sortir tout' seu, quand ein étot femme ed' mineur. D'abord, el' pus important, ch'tot d' norir es' famile. Jusqu'à ch' miyeu du vingtième sièque surtout, chés blancs-bonnets alle z'avott'nt arcours à ch' système D. : cha troquot vec' chés vosines, cha échingeot in coulon conte un lapin, eun' glaine conte ein pintard... Ech' but, ch'tot qu' ech' repas i soit fin prêt à temps. Là, où ch'tot pus compliqué, ch'tot sûr'mint pindant chés guerres. J'a artreuvé dins mes archifes ein viux blanc-bonnet qui dijot, que ch' rationn'mint i l' z'obligeott'nt à échinger du toubac conte un tiot peu d' margarine par exempe. Ch'est vos dire el' misère...
I avot donc chés repas à préparer, mais aussi et surtout ch' fameux briquet ! In moïenne, ch' repas du mineur ed' fond, i durot vingt-chinq minutes, et souvint i d'vot ête pris d'bout, notammint par chés gars payés au rind'mint. Alors, i étot mi question ed' préparer ein briquet qui allot durer eun' heure ou pus ! Fallot qu' cha soit étudié ch' briquet ! Pratique, bon et rapite à minger (tout ein programme). Mais i n'avot pas qu' cha à préparer, ch'est vrai qu' minger ch'tot vital, mais i fallot aussi s'occuper d' chés gosses in bas âche. Et id' n'avot pusse qu'asteure : chinq, six, sept, huit... Ch'a faijot du déluche, i fallot souvint arpasser drère eusses, netchier el' daine (chés masons d' mineurs alle z'étott'nt toudis bein intrét'nues). Et avant même qu' chés daines i seuch't'nt in dur, ch' tot de l' tierre battue, et choqu' chés blancs-bonnets i n'avott'nt pas querre, ch'tot d' vire arriver chés "chiqueux", qui, des fos, in juant à cartes, i crachott'nt à terre lu mastication, et là ch'tot tout' eun' affaire pou ravoir cha !

Heureus'mint i avot ch' diminche pou s'arposer, vos m' direz... Et bein pas toudis. Passque nou blanc-bonnet alle n' dévot mi eublier d' nétchier chés loqu' ed' fosse ed' sin mari, d' ses gosses, passqu'i fallot qu' cha soit sec pou l' lend'main. Faut pas eublier, qu' à ch' début de l' mine et même pindant longtimps, ch' mineur i n'avot qu'eun' seule tenue ! Mais l' buée du diminche, ch' tot rein à côté d' chelle du lind' main : là ch'tot eun' rute intreprisse, el' buée du lundi... Et combien d' chés blancs-bonnets qui gueulott'nt passque lu linche, alors qui étot agrinqué (pindu, quo) à ch' fil à linche déhors, i étot tout noirchi par el' buque (poussière) qu'ein déverchot su ch' terril ! Des fos, i fallot arcommincher. Sinon, quand qu' cha s' passot bein, que ch' linche i étot sec, fallot qu' nou blanc-bonnet alle arpasse. Et là, pas d' Rowenta... Ch'tot du fer in fonte (in l'app'lot core ech' poulissot), qu'ein faijot cauffer su ch' poêle à carbon. Em' grind-mère, alle m' dijot qu' pou connaîte el' bonne timpérature de ch' fer, i fallot raquer (cracher) ed'ssus avint d'arpasser, sinon, cha ardot (brulot) facil'mint ech' poulissot !

Voilà, ein hommache ed' plus à chés fin.mes, chés blancs-bonnets. Jord'hui, ein pourrot croire qu' ch'est pus facile qu'avant pou eusses. Mi, j' diros qu' ch'est vraimint différint.
Asteure, nompe ed' blancs-bonnets alle trim'n'ttnt à l'usine, dins chés bureaux, etc. Lu mari aussi : à l'usine, su chés chantiers, aussi dins chés bureaux. Et quoqu' ch'a n'est qui s' passe, ech' soir venu, quand tout l' monte i est rintré à l' mason ? Et bein, souvint, très souvint, mes gins, ech' blanc-bonnet i arssort es' n'attiralle pou sin ménache, s'armets à ch' fourneau, s'occupe d' chés gosses... Eun' aute époque ? Pou eusses, pas si sûr...

Comments

[Jacky Wallart]

Chalut Maceju,

Intéressant choqu' t'es m' raconte chi. Ecrêper, ch' t'ein viux mot ed' patois d' nou tiot pays. Ch'ti qui écrêpe, ch'est ch'ti qui gratte, qui râcle vec' es' main. Ein peut core treuver ch' l'espression : "Li, ch'est eun' rute écrépure(raclure)". Quant à ch' l'écrèpe-salière, ch'est bein ch' mot qu'ein utilisse, quand qu' ch'est qu'ein veut parler d'un rapiat, quand ch' t'homme i n'a qu' des zoursins dins ses poques... Ch' t'eun' bonne idée d'artique. Ein verra cha pus tard. Allez, adé...

[maceju]

j'connos qu'elqu'in qui ma appris cha ya , 3 ou 4 ans , et li un plus y appelle des fos sin blanc bonnet , des fos el mitant d'min lit , et la y vient cor d'em'n'apprinte un nouvieau mot , ya 1 heure ed' cha , j'min rappelle d'ja pu , cha yé j'viens d'aller l'arquerre ech' mot
ché in écrêpe salière ( radin ) té pourros faire incom lad'seur nan ?

[Marie-Claire]

Un très bel hommache à chés blancs-bonnets et à toutes ches femmes !