El' guiguite (1)

Bon, ch' printemps i est bein là, même si jord'hui i arfait sin musiau, ch' solé (soleil) i k'minche quand même à nous récauffer nou viux oches. A ch' printemps, ch'est ch' gardin qui va nous ardonner chi ed' chés bonnes suées. Surtout mi, chu core vec min louchet (bêche) et min ratiau... Mais, quand j'happe (attraper) ein cop d' mou, pou que j' seuche rabistoqué (arvigoré, ou plein d'entrain si vos préférez), et bein j' m'accorte eun' pausse et je m' sers alors eun' bonne guiguite...

Ech' mot-là, ein n' l'intinds pus d' trop. Ein l'y préfère "jus d'houblon", eun' "Seisse" (1664) ou core, après ech' match à Bollaert, dins chés cafés : "Eh, ch' tavernier, arversez-me eun' mousse". Pis, plein d'autes espressions. Allez, j' vas armonter em' pindule dins l' temps, comme d'habitute...

D'abord in pourrot croire qu' ch'à défaut d' vin qu'ein lèque de l' mousse dins nou Nord-Pas-d'Calais... Ein va vire cha tot-d'suite. Mais k'minchons par l' k'minch'mint (ch'est dur à écrire, et même à dire cha mes gins, nan ?). Ch'est mi tout-à-fait vrai, ni complèt'mint faux. Et ouais, i a d'jà éhu des vines, i a fort longtimps dins nou tiot pays, mi j'y arviendrai un aute cop... 

Vos êtes fin prêts, bein assis su vou cayelle. Ch'est parti ! Un bond, direct'mint chez ch' père Louis ch' Pieux, Ro de Frince. Ein est chi aux alintours ed' l'an 800, et cha réformot d'jà à l'époque... Et là, ch'est ein gars qui s'app'lot Benoît d'Aniane qui s'in prind à chés monastères. Toutes chés chanoissesses, alle devrott'nt archuvoir d'sormais et tous les jours, dins chés pays d' vines, tros lifes ed' vin et deux lifes ed' guiguite et dins nou tiot pays, sans vines, ch'tot tros lifes ed' guiguite, vec des fos eun' life ed' vin. In 846, ch' l'abbé Loup (de Ferrières) i écrivot qu' "in désespoir de s' procurer du vin (...) i fallot s' régaler de l' cervoisse". Attintion, cheule cervoisse ch'tot eun' guiguite qu'in faijot vec du blé, ed' l'orche... El' guiguite, cha voulot dire qu' ch'tot aromatisé vec chés fameusses fleurs d'houblon. Ch'est eun' tiote nuance qui faut arténir.

Un bond pus in arrière, et nous v'là ti pas arrivés amon d' chés Babyloniens. Ch'est eusses qui aurott'nt treuvé cheule arcette de l' guiguite in peurmier. Chés Egyptiens, arprenant el' tradition d' chés gins-là, i k'mminch'nt à brasser lu divin liquite et cha plaisot tell'mint qu' chés esportations alle pouvott'nt démarrer ! Lu préparation à chés Egyptiens, alle s'app'lot zythos. Mais, in n' pinse pas qu' nou cervoisse (ou nou guiguite) alle arot ein rapport vec lu arcette, tout simp'mint à cause d' chés ingrédients égyptiens qui n'étott'nt pas core arrivés jusque dins nou Gaule. Donc, i est fort possipe qu' cha soit eun' coïncidince. Eusses, lu zythos, et amon d' chés Gaulois, el' guiguite.

Apparemmint, si ein s' réfère à eun' feule artreuvée dins un life du neuvième sièque ed' nou ère, cheule guiguite, ch'tot eun' histoire ed' famile. Core ein cop, ch'tot l' femme qui s'occuppot d' tout cha. Alle procédot à ch' mélinge d'épeautre ou d'orche. D'ailleurs, dins ch' timps-là, chés céréales, ein les app'lot chés "braces" (qui nous a donné ch' mot : eun' brass'rie). Pis, d'ein cate familal, ch'est passé à eun' fabrication qu'ein appell'rot asteure industrielle. I n'ein fallot pou tout l' monte de l' guiguite... Dins chés villes, ein monte alors chés peurmiers fours banaux, duqu' chés femmes alle viench't'nt, conte eun' ardévance, cuire lu pain et donc, in plus, "brasser" lu guiguite. A l' campane, cha a brassé pindant core très longtimps, et toudis à s' mason.

Vers ch' miyeu du 13ème sièque (1268), chés "cervoisiers" ed' Paris, i fond'nt lu corporation et ch' patron des brasseux s'ra tout bonn'mint saint Arnould, évêque ed' Soissons, qui, à l' fin de ch' l'onssième sièque, lors d'eun' épidémie d' choléra, armarqua qu' chés buveux d' guiguite avott'nt beaucoup moins ed' coliques qu' chés buviaux d'iau... Et ouais, à l'époque, chés gins i n' buvott'nt mi de l'iau comme asteure, car id' na qui s' méfiott'nt ed' toutes chés contaminations naturelles (à pas confonte vec chelles d' jord'hui...) et i fallot toudis faire boulir cheule iau avint de l' consommer. Ch'est d'ailleurs pou cha qu'ein buvot putôt ch' vin, ch' cite (cidre), et nou guiguite...

(à suife... cha donne soi (soif) tout cha !)

Comments

[maceju]

d'su l'coup j'pinsos qu'chétot el nom de t'femme , passe que j'ai connu din l'temps , in marguerite , mais j'l'appellos toudis guiguite , ché p't'ête pour cha aussi qu'j'ai ker el bibine , ché comme cha qu'in appelot in canette a l'armée , chétot vraimint d'el bibine ,

[lechtimi-ne62]

Salut Jacky, té m'a donné bin soif à lire tout cha, j'ai arpinsé à min grand-père paternel qui avot travaillé chés un brasseu et insuite i faisot s'bière li minme, cha faisot du bin au transit...
Allé bonne journée et bin à ti aux tiens.
Christian ed Liévin.

[minloute]

cor un très bio sujet qu' t as fait, d' abord ché vrai que ch'terme là in l intind pas beaucoup , comme m' dijo Marie Claire , ché toudis bien documenté , un régal à lire , bravo Jacky

ravisse à égayer un peu à mette des photos , et l' tour i s'ra jué

[Marie-Claire]

Ben in a core appris plein d'cosses , el différence intre l' cervoise et l' guiguite, l'origine du mot brasserie et j'in passe
Et té sais que chés charentais i vientent ed planter des vignes sur el terril d'Haillicourt ?